Kum 2008 - 2010 chhung atana Dawrpui School Management Board hruaitu turte Joint Committee chuan hetiang hian a siam.

Chairman : Pu Lalhmingliana
Vice Chairman : Pu Chhawnkima Pachuau
Secretary : Pi K. Vanlalhriati
Asst. Secy. : Pu Lalhlimpuia Khiangte
Treasurer : Pu Lalrammuana
Fin. Secretary : Pu Malthantluanga

Adviser : Upa Mankunga

Committee Members:
1. Pi Neihtluangi 2. Dr. Tlangkunga3. Upa Zosangzuala 4. Pu K. Liantuala
5. Dr. Lalrindiki 6. Pu Vanhmingliana7. Dr. SR Zonunthara 8. Pu Lalthansanga
9. Pu Rosangliana (Masanga)10. Pu P.C Lianhmingthanga
Committee Members ni sa te:
1. President leh Secretary, Dawrpui VC
2. President leh Secretary, Dawrpui Br. YMA
3. President leh Secretary, Dawrpui Br. MHIP
4. President leh Secretary, Dawrpui Unit MUP
5. Principal, Dawrpui School of Sc. & Tech.
6. Headmistress, Dawrpui Middle School
7. Headmistress, Dawrpui Primary School
8. Head of Little Star

Khawtlang Duty ngawrh taka chhunzawm zel a ni a. Vengchhung thianghlimna leh sual dona kawngah mitinte ngawrh zawka tanlak kan ngai hle mai.

Tunkar chhung khan Zu leh mi awm tha duhlo mi engemaw zat man anni a, thuneitute hnenah hlan an ni. Tin, a neitu hriatloh zu fun tam tham tak chhar a ni.

Tunlai hian Bazar Bungkawn, Modern School bul velah hian standing- a Zu leh Ganja zuar thin an awm nia hriat a ni a, hetiang mi hria leh hmu kan awm chuan vengchhung hruaitute hriattir thuai thin tur a ni a, tin, hetiang mite hi lo inthiarfihlim thuai tura hriattir an ni bawk.

Tin, vengchhung mi ngei, vengchhunga buaina siam thin leh mi mit tikham zawnga khawsa thin an awm tih report dawn a ni a, sim vat tura hriattir an niin, anmahni pawh hriat an ni a, an sim vat loh chuan veng hruaituten an ko dawn a ni.

Tunlai hian in hmun/lo/ram chhiah khawn lai a ni a, la pelo pe duh tan N. Market thlaithar zawrhna hmunah khuan Revenue Deptt. an awm a, zing dar 10 atanga tlai dar 2 thleng pek theih a ni e.

Lalchawipuia S/o Vanlalsanga, Dawrpui West, ni 37- a upa chu Oct 23, 2008 (Ningani) zan dar 10:40 khan Khawsik vangin a boral a, hemi zan hian Dawrpui thlanmual- ah phum nghal a ni.

Dawrpui Kohhran Ramthar Committee bul tumin Salem Boarding-ah “Siam thar lehna Camp” neihpui turin 25 October, 2008 (Inrinni) khan Dawrpui Upa- Upa R. Zodingliana leh Upa Zosangzuala hovin mi 30 vel an zin chhuak a, Nilaini hian an lo haw leh ang. Home Mission North huam chhunga Missionary leh an kawppuite pual Camp a ni a. Speaker atan Pu Lalramliana (Ramtea) ani ang.

Pu Robert Lalnunmawia s/o PC Thandanga, Jail Veng chu vawiin (ie.18 October, 2008) zing dar 2:00 vel khan an chenna inah 'mit liam' natna avangin a boral. Vawiin vek ni 18 chawhnu dar 1:00-ah hian Rev. H. Zalawma'n a vuiliam ang.

Pu Robert-a hian unau pianpui 3 a nei a. Food and Civil Supply Deptt.-ah Sub. Inspector-in a lut a, tha taka thawk chho in, Inspector -ah kaisang a, a boral thlengin a thawk a ni.

Kum 2001 khan Vanlalhriati chu nupuia neiin fapa 2 an nei. Nupa inhmangaih leh fanau enkawl kawngah pawh inkawprem tak an ni a, chhungkhat laina huikhawm thiam tak a ni.

Aug 2008 thla bul khan Khawsik leh Chawei tui lo in a insawisel tan a. That leh mai inbeiseiin Doctor pawh rawn ngai a ti lo a. Amaherawhchu, that lam a pan theih mai loh avangin Doctor panpui a ni a, Investigation hrang hrang tih a ni a, Damdawi inah admit nghal a ni a, a khawsikte a reh chho bawk a, chhuah pui leh a nih hnuah a mit (eye) alo eng a, Damdawi inah bawk dah leh a ni. A mitliam hi alo nasa hle tawh a, that lam a pan theih tak loh avangin uluk leh duat taka enkawl a ni chungin Oct 18, 2008 zan khan Chatuan Ram alo pan ta a ni.

Lalremtluanga (Tluanga) s/o Vanlalhuala (New Market, Mualthanga Colony) chuan October ni 16 (Ningani) chawhnu dar 2:00 khan kumtluana a kawppui atan Lalnunmawii (Tenuni) d/o V. Dokhara, Ramhlun South chu Dawrpui Presbyterian Kohhran Biak Inah Kohhran Dan Thianghlimin 'Tiam tlat e' a tihpui ve leh ta. Inneihtirtu chu Rev. Rualkhuma a ni.

Lalbiakdika (Tea) s/o Zahmingliana (L) chuan October ni 14 chawhnu dar 1:00 (thla bial zan) khan kumtluana a kawppui atan Debbie Lalduhawmi, Armed veng chu Dawrpui Presbyterian Kohhran Biak Inah Rev. H. Zalawma hmaah a inkutsuihpui ta.


Lalbiakdika hi Dawrpui Branch KTP Leader ni mek ani a, Centenary School Dawrpui Church-ah hian Teacher in Debbie nen hian an thawk mek bawk a ni.

Greenwood Hospital, Aizawl chuan American NGO - The Smile Train nena thawhhona an siam angin Plastic Surgery thiam leh hmingthang ber zing ami Prof. Sashanka Chatterji an chah chhuak a, dang leh hmui kak lama harsatna neite chu engkim (zai man, khum man, damdawi man leh chaw ei man thlengin) a thlawn vekin an zaisak dawn a, Dawrpui Vengchhungah hetiang lama harsatna nei kan awm chuan a hnuaia tarlan hnenah hian in hriattir tur a ni e.

Contact : Dr. LB. Ralte
Phone : (0389) 2341395 / 2341397
E-mail : lbralte@hotmail.com

Central YMA atanga thu hmuh angin Dawrpui Veng chhungah Survey hrang hrang - Urban Deprived Children, Household Survey leh Adult Illiterate Survey te chu neih tur a ni a, hei hi kan Branch YMA Section hruaituten an kalpui dawn a, mipuite kan lo hriat lawk atan kan han tar lang e.

Non-Mizo han tih hian hnam dangte Kohhrana an inhman thu-ah inthlahrunna awmin sawi a ni a. Tin, ringlote a hnar deuh nia hriat a ni bawk. Hengte a nih avang hian Ramthar Board Executive Committee (BEC) 486:21 chuan 'Non-Mizo' tih thin chu Masihi Sangati (Christian Fellowship) tiin alo thlak ta a ni.

Masihi Sangati Area Meet hi 14-16 November, 2008 chhung hian Dawrpui Kohhran Biak Inah neih tura ruahman mek a ni.

Dawrpui Kohhran Naupang Sunday School chuan kumina NPSS intihsiaka lawmman Pakhatna an lak chu 9th Oct.,'08 nileng khan Biak inah ropui taka Pathian hnena lawmthu sawina leh a lawmna hun hman ani a. Chawhma leh tlai lamah naupangte intihhlimna chi hrang hrang neihpui an ni a. Chawhnu dar 1-ah Biak In Extension Hall-ah hunserh leh Fellowship programme hman ani bawk a, item a hmuhnawmin mit atlai hle. Thusawi tha tak tak ngaihthlak bawk a ni.
Tlai lam ruaitheh pawh mi an thahnem hle a, chaw pawh chhum belh leh hial ani. Hetianga tam kan pung khawm hi a lawmawm a inpawhna tha tak a thlen bawk a ni.

Kan hriat tawh angin 1988-a Dawrpuia YMA a din hma khan 'Dawrpui Thalai Pawl' (DTP) a awm a, khami kuma YMA a din hma lawk thla 15th June, 1988-a DTP hnatlang thlalak kha a ni a.

Dawrpui School lo lang (TT Board awmna thin) te leh Pu H. Thanmawiate in han ente hian a lunglen thlak hle mai! Pu H. Thanmawiate in thlang chiahah hian 'Vantlang Zun In' a awm thin a, chubakah bawlhhlawh paihna pawh a awm thin bawk a ni.

Upa Rokamlova in lo lang pawh khi tunah chuan a danglam hle toh ani.

Tuna hnatlangah khian mual minliamsan ta te pawh an awm toh nual mai thei bawk a, DTP khan YMA in an hmalak ang zawng zawng kha a vai hma vek a, Dawrpuiah chak takin rei tak chhung kha a ding a ni.

Pu Zadingluaia (VCM) Secy. MUP Dawrpui Unit chu Social Welfare Deptt.-in Mizoram Upa Pawl te puala 'Tlawmngai/Khawtlang tana inhmangte' hnena chawimawina a siamah Chawimawina Thuziak leh Rs. 1,000/- October ni 1, 2008 khan a dawng.

Pu Zadingluaia hian kum 60 a pel tawh a, mahse tlangval tam tak aiin a la viak tha a, chak pawh ala chak tha a, khawtlang huap chhiatni thulah a bang ngai lova. Thlanlaih, Kuang siam, Thlan vur etc. ah a bang ngailo. Kohhran thilah mi thahnemngai a ni a, thawh tur awmah a pha ngai lo.

Kohhran leh Khawtlang thil reng reng hi mahni ta anga en tlattu leh ta neihtu a ni. Hetiang Chawimawina Ropui a dawng hi a awm a, a phu hliah hliah a ni.