Pu Liandawla hi Pu Taitea leh Pi Chuailothangi te fa 5-na niin Date 1.5.1924-ah a piang a. Dawrpui Veng, Aizawla piang leh sei lian niin, Dawrpui Venga piangah chuan a upa ber ni tawh awmin a inhre nghe nghe thin a ni.

Pu Dawla hian fa paruk (6) a nei a, chungte chu :-

Pu Dawla hi naupan lai atanga nu leh pa thu awih thei mi tak a ni thin a. A tlangval lai atanga sumdawng thin a ni a. Amah hi inkhel mi leh inkhel thiam tak a ni thin. (Hockey, Football etc.) zuk leh hmuam lakah a inthiarfilhlim thin. Aizawla pianga sei lian zingah chuan zu in ngai lo awm chhun zinga mi a ni.

A dam loh dan : Kumin Sept. thla tir lam atangin hnar thi thinin a ke a vung bawk a, engemaw chen chu khawlai pawh a chhuak thei lo va. Oct. thla chawlhkar khatna leh hnihna chu dam tha leh deuhvin khawlaite a leng leh peih a. Chumi hnu dt 18.10.2009 (Sunday) atangin kawthalo leh pum nuam lote a nei leh a. Dt. 22.10.2009 (Thursday)-ah Care Hospital-ah admit a ni a, a tuk 23.10.2009-ah Civil Hospital-ah a lut leh a. A natna mit cancer (Gall-bladder) hmuhchhuah a ni a, amaherawchu a lo nasat tawh em avangin zual lam chak taka panin dt. 31.10.2009 zing dar 3:25 khan min lo peih lohsan ta a ni.

MHIP Sub Committee MHIP General Headquarter atanga ngenna Mizo hmeichhiate inchei dan chung chang member tinte hriat atan hetiang hian an tarlang e.

1. Mizo hmeichhia ten kan inchei dan phung awmsa reng puanbih hi inchei nan kan thlah tan mek niin a lang a, hei hi keini MHIP te hi a keng nungtu tur ber kan nih avangin puipunna hrang hrang - Inkhawmna, Mithi in, Khawhar inah leh Inneih etc. reng rengah puan bih hi uar zawka kal pui nise kan ti.

2. Kan hnam incheina bik puanchei, ngotekherh leh a dang te hi hunpui chi hrang hrang kan neih - Christmas leh Kumthar, Good Friday leh Easter Sunday leh khawmpui nikhua (Kohhran pawh ni se) ah hian a remchan dan anga uar zawk tura hmalak ni se.

Sanglura hi Pu Lallawma (L) te fa niin 1956-ah Kelzamah a lo pianga, an unau hi 5 an ni a, chhungkaw harsatna avangin Sikul a kal lova, ram hna a chhungte a thawhpui a ni, 1984 khan Bazar Sweeper-ah a thawk a, he hna hi a thihni thlengin a thawk a ni.

A NAT DAN : Mahni tawka hrisel tha tak a ni a, damloh pawh hi a nei ngai lo a, 2009 June thla vel atangin hritlang khawsik a nei ve a, mahse he ti chung pawh hian a hnathawh a thulh chuang lova, mahse zawi zawiin a natna hian zual lam a pan tak zel avangin August thlaah Grace Nursing Home-ah admit a ni a, Doctor ten TB niin an hria a, mahse he natna hi hriatchhuah theih a ni lova, ziaawm lam a pan theih loh avangin October 11-ah Presbyterian Hospital Durtlangah in entir leh in an admit a, a natna hian that lam a pan loh avangin October 15 (Ningani) zan 12:30 khan chatuan ram min lo pansan ta a ni.

Thisen pek hi tunah chuan kan uarin petu pawh kan tam hle a, a lawmawm e. Mahse tam tak thisen pek atanga chak ta lo leh dam lohna nei ainngai anawm nual thin a. Hei hi chu ngaihbel mai a ni a. A pe tlak lo, thisen nei tlem leh pianpui  thisen diklohna - hlauhawm lohna, thalaceamia, etc. te chu an awm a, heng hi chu an la ngai lo a ni. Thisen pek a hlauhawm lohna chu , kan thisen a sen tak (red blood cells) hi a rawn insiam atanga ni 120 ( thla 3) a nung a, chumi hnu chuan  a kehdarh a, kan zun ah ek ah a chhuak zo mai mai thin a ni. Tin, mipangai pian dik tan chuan a tlem berah thisen hi litre 5 aia tlem lo nei tura ngaih kanni a. Thisen an lak hian 350 - 450 ml hi a bur ah hian a awm sa a,chu chuan a ti lang tam ta em em a ni. Thisen Litre 5 vel atanga 450 ml vel aia tam hi a thi ral tho tho dawn a. A thar tha, thin leh thling etc. in a rawn siam leh mai a, chutiang chuan kan thisen hi a inthlak kual ve a ni. Hei vang hian a nia, mi pakhatin thihral tir mai mai ai chuan tu nunna emaw chhanna anih hre rengin pe ve thin la, nangmah ngei pawhin i mamawh ni a la thleng ve thei tih hriat a tha.

Hetih lai hian kanhriat fiah loh thin chu eng pawl emaw ten thisen unit chuti zat chu an pe a, engatinge damdawi In ah thisen a awm loh ? tih zawhna te a awm fo thin a. Damdawi In ah hian kan hmang hnem em em a, average in nitin bag 40 ang vel a nia chutih laiin damdawi In dang - Private Hospital ten an rawn la ve reng bawk a, rinrawl a han neih ve meuh a tan chuan a tam har hle a ni. A theih hram chuan hmeichhia hi kan la vak l a, a chhan chu thla tih thi nei annih vaang hian, mahse thalaifit tha tak annih erawh chuan kan la ve tho thin.
       

Thisen hi i lak tawh anih chuan a dah that na ah hian ni 35 (kar 5) chhung a hmantlak a,  hei aia rei anih chuan a chhe ve leh tho tih hriat tur. Thisen hi A, B, O, leh AB a awma, tam takin O ( AW) hi zero an ti thin a, ani lo a, ABC kan chhiar a O anga lam tur a ni. Tin, thisen i pek nual tawhchuan a awm ngang lo anih loh chuan nang leh i chhung ten lo mamawh se, rulh kher ngai lova pek anni thin. Hmanni lawk a BethlehemVeng thisen mamawh pawh, ‘In Vengin an pe tha em a, rulh a ngai lo’ an ti mai a ni.

‘Rulh’ han tih hian Ba rulh anga rulh ani lova midang pek leh zel tur a awm theih nan a dah khah leh (replace) a ni zawk a. Rul theilo an tam hian thisen kan neih tlem phah thin a ni. Chuvangin i thisen thla 3 hnu a thi ral mai mai tur ai kha , tu nunna emaw chhan nan lo pe ve ta che.
   

Thisen (Red Blood Cell) kehchhia a tam zia chu mitliamah hian a hriat mai a, mit a paih chhuah tur,  thisen keh darh kha a paih theih loh chuan reilo te ah mit a lo eng a, taksa thlengin a eng chhuak vek thin. Taksa pumpui ti eng khawp chu a kehdarh tam hle ang tih chu i hisap thiam mai in ka ring. Chuvangin thisen kehchhe mai tur hmanga mi nunna i lo chhan kha tlawmngaihna diktak, lawmman beiseilo a thil tha tih diktak chu a ni. Kan thlarau pawhKrista thisen a chhandam a ni a, he lei taksa pawh hi i thisen ngei khan a chhandam thei a sin.Mizo pasaltha,mihrang sa hrang hma a zam ngai lo kha hriau te tak te hma ah hian i zam mai dawn em ni ? i sa hliam um te chu damdawi ina thler diai duai khawp accident tawk te hi anni tawh a sin
  

Hman lai chuan Pasaltha chu ramhnuaiah an kal thauh thauh thin, tunah chuan kan ram hnuai chu concrete building leh mipui an lo ni ta, heng karah hian pa tak leh zam hauh loin blood bank lam pan han kal thauh thauh mai ta che! Lasi nula ang mai avar sar rual hovin an lo chhawn ang che.

- Dr Thangchungnunga, MS (Ortho)

President            -    Pu Lalchungnunga, Ramhlun North
Vice President    -    Pu C.Zoramliana, Tuikual North
Secretary           -    Pu Lalbiakzuala, Khatla
Asst Secretary    -    Pu Vanlalruata, Khatla South
Treasurer           -    Pu R.Lalngheta, Hlimen
Fin.Secretary     -    Pu J.Lalsailova, Mission Vengthlang 

Tunah chuan kan changkang ta a sikul naupang chenin mobile handset kan lek far ta mai a. A hmanna a that leh that loh - sex video t,e thu bawlhhlawh leh milem bawlhhlawh te, inngaihzawn nana inbiakna tul lem loa kan hman nasat lam sawi ka tum lo a.
Tunhnaia ICMR-in a hmuhchhuah chu mobile (India Council for Medic Research) handset-ah hian natna hrik a bet duh  em em a natna hrik sang tam tak bet rengin a hmangtu kha a hritlang emaw TB emaw etc.. engpawh nise inkaichhawn a awlsam tih an hmuchhuak a (Times Of India 7 April 2009). Heti anih vang hian a bikin damdawi ina thawkte leh damlo leh a awmpuitute ho hi natna hlauhawm bik pudarh hma bik an ni a, tunlaia MRS an tih mai eng damdawi mahina a tihhlum theih tawh loh natna hrik hi damlo zingah a kantute (visitors) zingah kai a awl em em bik a. Heng MRS ho hian damdawi an huat lohna chhan chu damdawi in leh a hu leng vel an hipin an ei nasa tawh lutuk a, thihpui lo turin resistance an insiam ve a, a lehlamah natna hrik thenkhat phei chu damdawi hi la bo vek ila an thih phah mai awm e  (a theory) an ti hial a ni.

Entirnan, damdawiin lian Civil hospital angahte hi chuan natna hrik hian huat a hnekin nun nan an hmang zawk niin researcher chuan an hria a. Chuvangin Hospital lianah chuan khawiahmah Ampicillin hlang hmang duh an awm tawh lo. Chutih laiin damdawi hman mang lohna thingtlang leh mimal damdawi ei ngai vak lo tan chuan a la tha em em tho a, a hmun leh a hun a zirin a inang lo a ni.

Tuna hritlang na tak khawsik tel kan inkai chhawn nasat em em pawh hi a chhan pakhat chu kutsil fai tawk loh leh mobile handset inhmansak chin vang a ni. Tuna hritlang leng phei hi chu nidang ami a ang lo a, a na riau a, khawsik a keng tel a, tuna SwineFlu chikhat atanga lo kal niin an ring, a strain (a hrik) hi an siam danglam ta deuh pawh a ni ang. Virus hi a hun leh a hmun a zira zia thlak ve zung zung thei anni a, chuvangin taksa chak vaklo chuan kai a awl em em a ni. Mi Mobile hanset hmang mai mai suh. Natna hrik thehdarhna tha tak a ni ringawt. Tin, kut silfai tih hian vawikhat fai deuh a sil a ni lova, engemaw khawih deuh chuan sil zung zung tur tihna zawk a ni.

Dawrpui Branch KTP hmalaknain Bhutan ram thim takah rawngbawlna neih ani a. Helai hmun atangin member 5 (Pu Lalthlanga, Tv. Hminga, Tv. Michael, Nl. Mapuii leh Nl. Mahruaii) -te kalin Shillong-ah Nl. Maremi'n lo zawm vein Siliguri atangin Tv. Zothankima'n alo zawm ve leh a, member 7-in rawngbawlna an han nei ta a ni. Sept. ni 21-a chhuakin Oct. ni 1 khan dam takin an lo haw leh.

i) Personal Evangelism (Thalai ho zingah a bik takin)

ii) Underground Church-te tlawhin thusawina leh fuihna hunte an hmana a. Hetah hian zai lama rawngbawlnate leh Testimony share nan hun hmang bawkin. Ringtu awmte tan house visiting an nei bawk.

iii) Prayer Walk & On-Site Worship - An sakhua hmun pawimawhahte leh sorkar hmun puiahte kalin tawngtaina hun tam tak an hmang.

A ram chanchin tlemte : Bhutan ram hi a bik takin Democratic Nation tih alo nih tak hnuah phei hi chuan tunah hian Pathian khawngaihna azarah a in hawng tawh khawp. Hun kal tawha Kristian awmte intihduhdahna an lo tawrh thin ang kha tunah hi chuan an dinhmun ani tawh lem lo. Bible literature sem leh Street Preaching ang chite hi chu a rem lova, hemi tih loh hi chu a chunga rawngbawl dan ki dangte khi chu buaina awm miah lovin tih a rem vek a ni.

Dawrpui Thlanmual Committee September 28 (Thawhţanni) 2009-a thukhawm chuan, Thlanmual hmangtu veng 6 (Paruk) ten kan thlanmual in hman tawm mek hi hun rei zawk leh felfai zawka kan hman theihna tur atan thlan hungna chungchangah ruahmanna a siam a, heng a hnuaia ruahmannate hi zawm theih turin kan in ngen a ni e.

1. THLAN HUNG TAWH LOH TUR : Tun atang chuan thlanmuala in phum turte reng reng chuan thlan hungna siam tawh loh tur a ni a, chhinchhiahna felfai tak siam zawk tur a ni.

2. THLAN HUNG TAWHTE TAN : Thlan hungna awm hian tun hma atang leh tun hun leh hun lo la kal zel tur atan, harsatna tam tak min siam mek in min siam belh zel dawna, heng avangte hian :

a) Thlan hungna thir/thing zum hian thlan laitu kan thalaite in tih palhna alo thlen fo tawh thina, heng bakah hian thlan vur turte tan a bula thlan in hung a awm hian chetlakna a tibuai thin.
b) Thlan hungna hian ruang vuiturte tan harsatna a thlen nasa em em a, kuang pawh zawn hleih theih loh leh kal hleih theih lovin kal kawng a dip thin.
c) Thlan laiturte tan, a bula thlan in hung a awm hian chetlak a ti remchang lovin, hun tam tak min paih phah tir thin.
d) Thlan pala hnimbuk zamte hian mi awm tha duhlote tan remchanna a siamsak thin a, Drugs/Zu addict-te leh zan vak thinte tan riahna hmun leh thilsual tihna atan an hmang thin.

Heng bakah hian sawi tur tam tak a awm, heng avangte hian Dawrpui thlanmual Committee chuan thlanmuala chhungte thlan hungna siam tawh reng reng chuan, tun kum chhung ngeia kan thlan hungna te thiat tur in kan in ngen a ni e.

Thlanmual Committee hminga awareness leh Circular hmanga vengtinah pek nise, mahni veng chanchinbuah theuh puanzar ni bawk se, heng bakah hian Cable TV-ah leh Daily News Paper-ah chhuah ni bawk se. Thlanmual Committee ten hun remchang hmasa berah Thlanmual hmun fan ni bawk se tiha hmalak tum a ni.

Kan sawi a kan sawi nawn leh fo a ngai dawn a ni. Ruh seh leh Saitika ngaih pawlh tlat kan la tam khawp mai. Ruhseh hi chu nasa vak lovin kan nei deuh vek a, a bikin ruhseh dik tak (Rheumatoid Arthritis) hi hriat a ţha. Hetiang nei hi chu an mal leh chawnahte a lo duk tlek a, ni 2 ni 3-ah a reh leh a, a insawn leh a. Hei hi ruhseh i nei tih test-na thisen test ai pawha chiang a ni. Ruhseh pumthlak Mizopain an ti a, hetiang i neih chuan zan mutte hian ana ţhem ţhum a, zing thawhah phei chuan apum khawng ti tih a ni ber. A bikin kut zung ţang hi a khawng ţhum ţhin. Han nuai nawk nawk chuan a reh ve leh mai a. An han tho a, lei rah a lo har leh a, pen hnih thum velah chuan a pangngai leh mai a, chhunah chuan mi angin hna an thawk ve thei a, a tlai telh telh a, ana telh telh a, mut hunah phei chuan na deuhin an mu ţhin.

Kan ruhseh test-na, thisen an en ţhin hian negative (awmlo) an ti ţhin a. Mizote hi chu zawng thisen (Rhesus Monkey Blood) kai kan ni a, kan test-na hman hi sap ho leh vai (Eurosian) Rhesus Monkey Blood nei ve lo tana siam a ni a. Chuvangin ruhseh test-naah hian negative kan ni deuh zel ţhin. Chuvangin, i mal duk thlek thlek leh zing thawha i kutzungţang khawng deuh ţhum kha a test-na dik tak chu a ni mai. Mizote hi chu thisen test- naah hi chuan Sero Negative Type kan ni tih hriat tur. Pi Sonia Gandhi lokal pawh khan ama thisen milpui mihring a rawn hruaisa a nih kha.

Tin, ruseh hrim hrim, ruhseh tenau, ruhseh naute, (Juvenile rheumatoid arthritis) hi kan nei deuh vek a. A tam ber chu kum 2 an nih vel aţangin a lang a. An sikul bangte hi “Ka khup/mal a na,” tiin an ţap ţhin a. Zan mut tirh lamahte a chhuak duh a. Mahse a tukah dawt sawi ang hlauhin duhtawkin an tlankual leh thei si a ni.

Ruhseh hian damdawi chu a ngah mai a, sawi sen a ni lovang. Mahse a tizualtu deuh hi ei tlem ila. Heng - Bawngsa, Vawksa, Kelsa, Uisa leh Zawngţah, Bekang leh Thingthupui tih ho hi ei tlem i zir ang u. I fapa/fanu zan mut dawnah a ke na a tih chuan han nuai sak nawk nawk la, emaw nachhawkna (Paracetamol) phel lek han pe la a reh ve leh mai, a ei reng tur chu a ni lo. Ruhseh neih vanga rilru tih hah pawh a sawt lo. Hun pui inţhen apiangin - Fur leh Ţhal, Ţhal leh Thlasik inthlak laite hi a zual duh hun a ni ţhin. Ni asa val val a, i khup alo nat chuan a tukah ruah a sur dawn ti la a sual lem lovang. Ţhal leh Fur inţhen fel dawn lai hian hetiang hian an awm ţhin. Tin, chhunah pawh dawr emaw khawiah emaw ţhut reng anih chuan thawh leh a har em em a, a khawng hma ţhin.

A chanchin : Lalremruati (2½ yrs) hi T/Upa Vanpuilala leh Pi Lalremsangi te tlum ber ni turin 29th May 2007 khan Churachandpur-ah a lo pianga, unau 7 neiin tunah hian Dawrpui South-ah an cheng meka, Lalremruati hi mi ti hlim thei tak leh fiamthu duhtak leh huaibak sual leh nawrh velte pawh a ching ngailo emaw tih mai tur a nia a hlim thei em em a, in leng an neihte a chhawnchhaih peih hle thin.

May 30th 2009 vel atang khan he natna hi a rawn chhuak leh tan a, lang lemlo in a taksa chhungah hna a lo thawk ru rengte pawh a lo ni a, Shija Hospital Imphal lam an panpui leh a, hetah hian zai nawn leh a ni a. Mahse an zai nawn leh hnu hian thatlam a pan thei loh avangin In lamah hawpui leh zawk mai tha a an hriat avang leh tawngtai dam theite pan a beiseina an neih avangin kan rawn haw thlak pui ta a ni.
Tichuan in lamah an theih ang anga inenkawl in leh tawngtai dam theite an panpui a, mahse, a natna hian ziaawm lam a pan thei ta meuh lova Aizawl Civil Hospital panpui a ni a, 30th September zing dar 1:50 khan chatuan ram min lo pansanta a ni.