Dr. Rohlua kan chan ta

A chanchin : Dr. Lalrohlua h/o Lalnuntluangi, Dawrpui hi Upa C. Rualhleia leh Chalzawni (Republic) te fa 8 zinga a palina niin. Mizoram buai kum 1966 January ni 4 khan Tachhip khuaah a lo piang a. Pa zaidam tak, thin nel, mi ze zawi raih mai, uluk leh muang changa thil ti thin mi a ni a. A naupan lai atanga mi in uluk, a pa zirtirna anga nungchang mawileh awmdan tha vawn tum tlat thin mi a ni a. Doctor anih anga amah pan thintute pawhin an sawi fo thin chu he a mize duhawm tak hi a ni a. Tunah hian Aizawl Civil Hospital-ah ENT Specialist niin a hun tawp thlengin hetah hian a thawk a ni.

Kum 1996 January ni 24 khan Lalnuntluangi d/o Lalhmingliana (Thanzauva & Sons), Dawrpui nen Republic Veng Presbyterian Kohhran Biak inah Kohhran Dan Thianghlimin an innei a. Fa 3 neiin tunah hian Dawrpui South-ah an cheng mek a ni. Bible-a a duh ber lai chu Johana bung 13:34 thu - ‘Hmangaihna Thu’ a ni a, a phak ang tawk tawka kohhran
programme ngai pawimawh thin mi a ni a. Pathian hnena thil pek leh mi hnuaihnung leh chanhai zawkte tanpui kawngahte hian thahnem a ngai thei hle. Missionary chawm lai mek pawh hmun 3 laiah a nei a ni.

A nat dan : September 2008 vel atang khan khawsik leh khawthalo reh hlei theilo a neih tak tlat avangin Doctor ta nafam chu a inringhlel tan a. Kolkata-ah in entirin a mit dawta lungte awm nia a hriat chu bawk (tumor) a ni tih hmuhchhuah a ni a. New Delhi lamah in entir lehin a mit dawta bawk awm chu cancer (Cholangio Carcinoma) ani tih hmuhchhuah a ni ta a ni. Check up leh in entir hian hmun dangah pawh an kal nual bawk a. Pa tuarchhel leh huaisen ve tak anih avangin a natna pawh chhel takin a tuar chho thei zel a. Pathian lamah hlimna leh lawmna tharte pawh nei chho zelin, a hna pawh hun engemaw chen chu a chhunzawm leh thei ta hial a. Kumin kum tir lam atang khan a natna chuan a rawn khawih buai chho leh tan a. Chutianga hun engemaw chen a tuar tang tang hnuah a tlin phak bak a lo thleng ta a. August ni 13, 2010-ah Aizawl Civil Hospital ICU-ah dah luh a ni a, a tuk ni 14-ah phei chuan chatthla mai thei dinhmunah a din avangin chhungkhat laina an in ko khawm chuk chuk a. Amaherawhchu, August ni 16-ah Pathian tanpuina dawngin a harh tha viau thung a, a awmna ICU ward-ah ‘Tawngtai Rual’ leh ‘Hnehna Puan’ hunte hman a rawt a, amah pawhin Pathian thlarau pawlna thar a chang nasa hle a. A nupui fanau, a nu leh pa leh unaute hnenah pawh Pathian thlarau hriattirin thuchah pawimawh tak tak a sawi thei a. A harh tha chho viau dawn emaw tih lai chuan August ni 20, 2010 khan a lo chau zual leh thut a, a lei taksa chu alo chau chho tial tial a, August ni 21, 2010 (10:00AM) -ah chuan amah ngei pawhin “Ka kalna tur chu a va nuam dawn em!” tia nghakhlel taka a thlir reng Van Jerusalem thar lam chu panin he a khual zin kawng khawvel hi a lo chhuahsan ta a ni.