Ran seh

Tunlai hian Sazu seh, kut zungtang pan/pun an tam riau a. Hei hi thil pawi tak a ni a, vantlang hriattur chu, ran leh mihring seh reng reng chu a hlauhawm vek tih hriat tur. Ui a seh phei chu kan sawi fo tawh thin angin kum 90-ah pawh a la lang chuak thei tho thin. Tin, heng bawng, vawk, ar, sazu leh zawhte leh ui seh ho hi thi chhuak khawpa seh a nih chuan a rang thei ang berin tuiah silfai nghal la, damdawi inah Titenus venna leh a punlohna a in chiu nghal a, a balh phei chuan zaifai a ngai thin. Hetianga tilo a, tuar mai mai a, pun leh si, kutzungtang kan paihsak hi an tam em em mai a. Kut rau rauah kut zungpui leh zungchal hi a pawimawh bik a. Kut zungpui i neih chuan a dang neilo mah la mi tih theih za a sawmnga chu i ti ve thei tho ang. Kut zungpui neilo a, a dang i neih vek chuan za a sawmnga i tithei lo zawk ang. Hetiang hi anih avangin kut zungtang tinhna pan leh vungte hi ngaihpawimawh em em tur a ni. Nitin nun a tihbuai theih zia hi han neilo chiah la, i hre mai ang.

Tin, kan taksaa natna chi hrang hrang englai pawha tamna ber chu kan ka ha leh a chhung vel hi a ni tih hriat tur. USA-a an research-ah chuan ka chhunga natna hrik awm aiin mawngkuaa natna hrik awm hi a letin a tam zawk tih an hmuchhuak a. Chuvangin, in kiss mai maite hi felfai that loh chuan tih mai chi a ni lo. Mihring seh
ngat phei hi chu pun lova dam hi vang tak an ni. a tira enkawl, silfai vat a nih loh chuan za a za pan/pun tur a ngaih mai tur.
Ui seh hi vantlang rilruah kan la buai reng a, ui a seh venna a inchiu tur nge tur loh tihah hian a theory-ah chuan ui a lo seh chu a lo tura ngaih ni mahse, ui a hri hi a seh atanga ni 15-ah a lang chhuak a. A lan loh pawhin damchhungin engtik hunah pawh a langchhuak thei tih hria ila. A sehtu che ui pawh kha a lo mahse, a hrik a pai leh pailoh hriat a ni lo a; Vaccine-a chiu that vanga zaa za veng tura ngaih theih a ni lova. Mihring pawh sentut venna in inchiu vek kan ni a, sentut vei chu an awm leh tho a. TB venna a chiu loh tunlaiah chuan mihring an awm tawh kher lovang a, mahse, TB vei leh TB vanga thi kan la ngah tho hian vaccine-a inchiu hian vei thei lo tawp turin min veng reng lo tih a hriat mai a. Chutiang tho chuan ui seh pawh a pilh/thi mang lo thi ser ser nilo, thi leh kak khawpa a seh che chuan ihe lova ui a venna damdawi a inchiu mai hi mipui rilru damna tur niin a lang.
Tin, a chiuna man hi a ui neitu in a tum tur a ni a, hei hi Animal Protection Act pawhin a phut a ni.Misual deuh inchiuna man pawh seng duh lo, ui neitu hi an awm nual a, hengho hi chu inkhawm kim dapin tlang sawn theihna khawp hial thiltihtheihna pawh nei mahse Vanram kailo tur chi-ah ngaih mai tur. Mahni mihring pui pawh hmangaih thei lo chuan Pathian hmuhtheihloh lehnghal chu a hmangaih thei hauh lovang le. I ngaih dan nilo mahse logic, Pathianina rilru min pek sain a pawm tlat lo.