Mawngmirh

Mawngmirh kan tih mai hi Rulhut chi khat, Pin Worm a ni a, a bikin rilpuiah hian an awm bik deuh a, a then phei chu an lo vak chhuak a, mawngkaw kam velah an awm a, a za leh thak deuh ten an hre thin a. Hei hi chu an lo chhuak in a a tih zat a ni a, hetianga lo chhuak khawp an nih chuan an tam hle tih hriat tur a ni a, tunlaia rulhut kan hriat theih lar ber chu a ni ta mai a. Tunhma a rulhut (Ascaris) seipui pui ang kha chu, khawpui chauh pawh nilo, thingtlangah pawh a tam zawk chuan an nei tawh meuh lo. Hei hian kan hriselna a tha sawtin, ei leh inah kan fimkhurin kan che thianghlim sawt hle tih chu a hriat theih a ni.
Mahse, heng Tape Worm (Rulhut pui) vawk bawl atanga kai chi te, Ascarius changpat ang deuha sei rulhut pangngai ho hi awm tawh lo mah se, Hook Worm (Rulhut kawm) leh Thread Worm (Mawngmirh) te hi kan la
neihna chhan chu, kut silfai kan la uar tawk loh bakah ei leh in kan la thianghlim felfai tawk lo tihna ani ber a. Chuvangin heng damdawi hi chu a bik deuh Mebendazole (Mebex etc) nitin mum khat ei a, ni thum ei chi hi a ngai a. A vantlang tan chuan rulhut hlo (No worm etc) tih ang ho zan mut dawna vawikhat ei chi hi, thla 6 danah chhungkuaa mum khat ei rual thap mai hi a him ber a ni. Naupang kum hnih chunglam chuan mum khat hi a dose a ni mai a, heng ang hi chu doctor rawn kher lovin, mahni chhungkaw habit ang deuh a neih mai tur. Kum hnih hnuai lam chu a tui bur chanve zan hnih pek mai tur, naupang an bawhvah lai hi rulhut leh natna hrang hrang an kai duh hun lai ber a ni a, an hmuh a piang an ei mai si a, kailo thei an ni lo.
Tin, puitling hian kan pai ve thei tho tih hriat tur a ni a, pumnuam lo teuh teuh te hi a reh duak thei a, a chunga sawi ang hian ti thei hram ila chuan chhungkaw tin tan a tha ber ang.