Pu J. Challuta kan chan ta

Pu James Challuta, Kum 85, Zion Street chu September ni 10, 2011 (Inrinni) chawhnu dar 2:10 khan lung na avangin Civil Hospital-ah a boral a, September ni 11 chhun dar 12:00 khan Roman Catholic danin Dawrpui thlanmualah vuiliam a ni. (Amah hi Dawrpui YMA hruaitu hlun Chawimawina pawh lo dawng tawh Pu F. Lalengmawia pa a ni)
A chanchin : Pu James Challuta hi Thangneuva (L) leh Mawikungi (L) te fa upa ber niin 1926 khan Zote khuaah alo piang a. Pianpui unau 3 (Hmeichhia vek) a nei. Zirna lamah Dawrpui Primary School atanga zir tanin Shillong Don Bosco School-ah Class X a zo a ni. Kum 1947 khan Mizo zinga Catholic Puithiam hmasa ber Rev. Fr. A. Sanglura(L) Baptisma an chang.
Zirna lam chawlhsan hnu hian a pa u, Thangruma (L) te sumdawnna puiin an hnen atang hian a indang a. Dawr
siamin a tluang hle a, General Merchant atangin Motor Parts-ah a inlet a, Mizo District-a motor nei hmasa pawl a ni. Kum 1950-ah Brigid Darziki (L) nen inneiin fapa 6 leh fanu 2 an nei.
Amah hi mi ingaitlawm leh tawng tlem a ni a, thian kawm thiam tak a ni a, tlawmngai leh mirethei chunga khawngaihna ngah tak a ni. Tu leh fate hmangaih a, kilkawi peih a ni a, zirna ngaisang mi a ni a, a fate pawh phai lam school thaah a zirtir deuh vek a ni.
Dawrpui-a Catholic Kohhran alo din theihna atana sulsutu ber a ni a. Biak in an neih theih nan theihtawp a chhuah a, tuna St. Mary’s Biak In (a hma chuan Dawrpui Catholic? hming a pu thin) alo ding ta te hi a hmalakna rah liau liau a ni a, amah pawh a lawm hle thin a, hna pawh a uluk a, “Pu Challuta Biak In” an ti hial thin. Heng chanvo hrang hrangte hi a lo chelh tawh thin :
1. Catholic Hmasawn Pawl - Treasurer
2. Thalai Chanchinbu - Publisher
3. Dawrpui Catholic Kohhran Committee - Chairman & Vice. Chairman
4. St. Mary’s Parish Council - Chairman & Treasurer
Khawtlang lamah Upa Pawlah a theih ang tawka inhmang chhoin “Life Member” a ni a. Hruaitu hlun tia chhal ngam khawpa neitu a ni a, Treasurer hna hi 1996 - 2004 chhung a chelh a, Aizawl East II Area MUP-ah Execuitve Member hna hi kum 10 a chelh bakah a thih thleng hian Adviser a ni.
A nat tan dan : Kum 2005 atanga insawisel tanin phai lamah te pawh kalpui a ni a. Kum 2008 -a a nupuiin a thihsan hnu atang phei chuan a chaklo zual hle. In lamah uluk leh duat taka enkawl a ni a, Sept 6, 2011 tuk khan a zing tho a tlu palh a, a Thluakah thisen a tling a, Damdawi inah enkawl a niin a hniam hret hret zel a, Oxygen nena enkawl zui niin Sept 10, 2011 chawhnu lam dar 2:10 khan Pathian hnenah hahdam takin alo chawl ta a ni.